Vertskapet er Liv Hatleli og Geoffrey Gilpin, eit nyutdanna, ungt par frå Fresvik og Canada som har flytta heim til den vesle bygda Fresvik for å drive økologisk gardshotell. Me har begge lang erfaring med økologisk matproduksjon i teori og praksis. Geoff er sivilingeniør og tek no ein doktorgrad innan fornybar energi, medan Liv arbeider med prosjekt innan frukt og bær ved Njøs Næringsutvikling AS.

Garden som Frøys hus er ein del av vert driven av Liv sine foreldre, Rune Hatleli og Bjørg Fritsvold. Rune driv med sau og produksjon av kosttilskotet "Frøy svarthyll" på fulltid, medan Bjørg arbeider som rektor ved Sogn jord og hagebruksskule i Aurland.